سریلیب اوستونه باغچالار باغلار
او تورپاق حسرتى اوره یى داغلار
سندن اوزاق دوشن هر زامان آغلار
سلطانین باشینا گلیب چیخایدیم
تبریزیمه یانا یانا باخایدیم ...
فلک اوزاق سالیر هر کیمى یاردان
اووچونو مارال دان ، باغبانى باردان
وطن قوخوسو من آلیم هاردان ؟
عینالى یا هر گون گلیب چیخایدیم
تبریزیمه یانا یانا باخایدیم ...
ارکین کرپیجى نى اؤپمه یه گلیم
سورتوشسون داغینا ، داشینا الیم
کئشکه لال اولمایا سوسمایا دیلیم
سهند قالاسینا گلیب چیخایدیم
تبریزیمه یانا یانا باخایدیم ...
آى ایللر یورغونو، آى قوجا تبریز
چاغیر قوجاغیندا جوموب یاتاق بیز
وطنیم آنادیر ، وطنیم عزیز
جوت باجى یا بیرده گلیب چیخایدیم
تبریزیمه یانا یانا باخایدیم ...
(بابک قوجازاده)
