یئتیم عیوضین "آذربایجان" آدلی شعری

داها ائشیدیلمیر شیرین سَسیمیز

داها کورلانیبدی گورمور گوزوموز

هانی تبریزیمیز ؟! هانی گویجه میز ؟!

آغلا گئجه - گوندوز ; آغلا ساوالان !!

نه اولوب سنه آخی ، آی آذربایجان ؟!

آسانجا یوللارا چکدین حاصار - بَند

پای وئردین ائرمنی یه نئچه شَهَر، کند

گوزلری یوللاردا آغلاییر دَربَند

سامورون پوستوندا دایانیب ایلان !!

نه اولوب سنه آخی ، آی آذربایجان ؟!

ایتیب - باتیب ، دوستوم او چاغلار هانی ؟!!

زیندان، قازامات دی قاراداغ تانی

سن، مندن سوروش کی ، قاراباغ هانی ؟!

دئییم;- پیس گونده دی (( واقیف ))،(( ناتوان))

نه اولوب سنه آخی، آی آذربایجان ؟!

هرشئیین یئری وار ، بیل اوز  آدیندا

دینله بو شعریمی ، ساخلا یادیندا

ایشیق سیز ، فازسیز اودلار یوردوندا

بو یانی قوبادی ، او یان لنکران

نه اولوب سنه آخی ، آی آذربایجان ؟!

عیوض قوربانوف ( یئتیم عیوض )

"یئتیم عیوض" تخلوصو ایله تانینان، عیوض قوربانوف 26 - فئورال، 1952 - ینجی ایلده سییزن رایونوندا آنادان اولموشدور. سییزن شهر جعفر جبارلی آدینا 1 - نومره لی مکتب ده اوخویوب. 10 ایلدن سونرا حربی خدمته گئدیب، 21 ایل سوروجو ایشله میشدیر.

1996 - ینجی ایله کیمی یاخشی یاشاییب، آمما 1996 - 2006 - ینجی ایللرده پول قازانماق اوچون هر اذیته قاتلاشیب. اودون دوغراییب - ساتیب، سوروجولوک ائله ییردی.

شعر یازماغا 15 یاشیندان باشلامیشدیر. اوز دئدییینه گوره، بو گونه قدر 2423 قطعه شعر یازمیشدی.

عمومیتله اونون یازدیغی و تویلاردا سویله دییی موسیقیلی شعرلر بویوک شوهرت قازانمیش و اونو خالقا سئودیرمیشدی. عیوض قوربانوف - ون ایکی قیزی و ایکی اوغلو واردی.

ترومب خسته لیییندن اذیت چکن شاعیر 23 - اییول، 2017 - ینجی ایلده 65 یاشیندا وفات ائتمیشدیر. او، اوز دوغما کندینده دفن اولونموشدور.