1. "گؤک‌تورک" دئولتی‌نین گئرچک آدی اورخون یازیتلاریندا ساده‌جه "تورک خاقانلیغی" اولاراق گئچمکده‌دیر (تورک خاقانلیغی تورک دئولتی آنلامینا گلیر). گؤک‌تورک ایسه مودئرن تاریخچیلرین و تورکولوگلارین اونلارا یاخیشدیردیقلاری آددیر.
2. تاریخ‌ده "قاراخانلی‌لار" و یا "قاراخانیان" آدلی دئولت یوخدور. 9-جو یوز ایلده (840- 1212) تورکیستان'دا قورولموش اولان و گونوموزده‌کی تاریخ کیتابلاریندا قاراخانلی دئولتی آدی ایله تانینان بو تورک دئولتی‌نین آدی یابانجی تاریخچیلر طرفیندن تحریف ائدیلمیشدیر. قاراخانلی آدینی بو دئولته روس تاریخچی گریگوری‌یئو وئریپ. قاراخانلی‌لار ایسه اؤزلرینه "تورک خاقانلیغی" و یا "تورک دئولتی" آدینی وئریپلر. آیریجا بیر سیرا قایناقلاردا بو تورک دئولتی‌نین آدی "خاقانیه"، "ائلیگ خانیان" و "آل-ی افراسیاب" اولاراق گئچر.
3. 12-جی یوز ایلده (1171- 1252) اورتادوغو'دا صلاح‌الدین ایوبی'نین قوردوغو و "ایوبی‌لر" آدی ایله تانینان دئولتین گئرچک آدی "الدولة الترکیه"دیر، یعنی تورک دئولتی.
4. 13-جو یوز ایلده بوگونکو میصیر و حجاز'دا قورولان (1250-1517) "مملوک‌لر" و یا "ممالیک‌لر" دئولتی‌نین گئرچک آدی "دولة الترکیه (تورک دئولتی)"دیر، مملوک‌لر ایوبی‌لرین واریثی "دولة الترکیه (تورک دئولتی)" آدینی قورویوپ ساخلاییپلار.
5. 16-جی یوز ایلده (1526- 1858) ظهیرالدین محمد بابور شاه'ین هیندیستان'دا قوردوغو دئولتین آدی "بؤیوک موغول" دئولتی دئییل‌دیر. بو دئولتین آدی تاریخی متینلرده "کوره‌کنلی‌لر" و یا "هیند کوره‌کنلی‌لری" (هیند گورکانی‌لری - گورکانیان هند)" اولاراق گئچر. آیریجا بابور شاه'ین کندیسی طرفیندن یازیلان "بابورنامه"ده کندی دئولتی‌نی تورک دئولتی دئیه وورغولاییپ بو دئولتی تورکلرین دئولتلریندن بیری اولاراق بلیرله‌میشدیر. "بؤیوک موغول" دئولتی آدینی اینگیلز‌لر سیاسی آماج‌لا بو تورک ایمپاراتورلوغونا تاخمیشلار.
6. 16–جی یوز ایلده (1501-1736) باتی‌آسیا'دا (گونوموز ایران، عیراق، پاکیستان، آذربایجان، تورکییه، گورجیستان، ائرمنیستان، قوزئی قافقاز، تورکمنیستان، آفغانیستان) قورولان تورک دئولتی‌نین آدی ایران صفوی‌لری و یا آذربایجان صفوی‌لری دئولتی دئییل‌دیر. دئولتین آدی "قیزیلباشیه دئولتی (قیزیلباشلار دئولتی)" اؤیله‌جه ده "صفویه دئولتی، دئولت-ی صفویه (صفوی دئولتی)"دیر.
گونوموزده‌کی تاریخ قایناقلاریندا، روس، اینگیلیز، عرب و فارس تاریخچیلری هپ پولیتیک آماجلار اوزه‌ره (تورکلرین قوردوقلاری دئولتلره تورک دئولتی دئمه‌مک اوچون) تورک دئولتلری‌نین آدلارینی ده‌ییشدیرمیشلر، بونونلا یاناشی تورک بویلاری و ائللری‌نین اؤیله‌جه ده تورک جوغرافیالاری‌نین دا آدلارینی (تورکلرین یاشادیغی جوغرافیالارین تورکچه آدلارینی) ده‌ییشمیشلر. "تورکیستان - تورک‌ائلی"، "دوغو تورکیستان - دوغو تورک‌ائلی"، "باتی تورکیستان – باتی تورک‌ائلی"، "قوزئی تورکیستان – قوزئی تورک‌ائلی"، "گونئی تورکیستان - گونئی تورک‌ائلی"، "تورکمانیه"* و... گیبی تورک جوغرافیالاری‌نین اؤزگون آدلارینی یاپای آدلار و یا ائل آدلاری‌یلا ده‌ییشمیشلر. بونونلا بیرلیکده بیر چوخ تاریخی قایناقلاردا بؤیوک و گئنیش تورکیستان (تورکچه‌سی "تورک‌ائلی") جوغرافیاسیندا گونوموز ایران جوغرافیاسی‌نین دا یئر آلدیغینا تانیق اولماقداییق.
* - تاریخی قایناقلاردا، "تورکمانیه" آدی 12-جی یوز ایلدن بری دوغو آنادولو، ایران'ین قوزئیی، قافقاز و عیراق'ین قوزئی بؤلگه‌لری‌نین آدی اولاراق گئچر.
